“ Unigolyn sy’n cael ei gam-drin (neu dan fygythiad o gael ei gam-drin) yn emosiynol, yn gorfforol, yn rhywiol, yn seicolegol neu’n ariannol gan eu partner, aelod o’r teulu neu rywun lle mae neu lle bu perthynas â hwy”
(Fforwm Trais yn y Cartref Powys – 2000)

Partneriaeth amlasiantaethol o fudiadau statudol a gwirfoddol yw Fforwm Trais yn y Cartref  Powys  sy’n ymroddedig tuag at leihau’r achosion o drais yn y cartref. Mae’r Fforwm yn cynnwys cynrychiolwyr o Gyngor Sir Powys, Bwrdd Iechyd Lleol Powys, Yr Heddlu, Y Gwasanaeth Prawf, Cymorth i Fenywod, Cyngor Alcohol a Chyffuriau Powys a Chymorth i Ddioddefwyr Powys.

Mae 2 ddarn o ddeddfwriaeth bwysig yn tanategu gwaith y Fforwm ym Mhowys: Deddf Trosedd ac Anrhefn 1998 a Deddf Trais Domestig, Troseddau a Dioddefwyr 2004 (The Domestic Violence Crime and Victims Act 2004). Mae’r ddeddf olaf hon yn cynyddu’r diogelwch cyfreithiol i ferched a phlant/pobl ifanc – a fydd yn galluogi mwy o ddioddefwyr i aros yn eu cartrefi eu hunain a theimlo’n ddiogel.

Mae’r Fforwm wedi llunio cynllun gweithredu am y 3 blynedd nesaf a’i nod yw Hyrwyddo’r neges nad yw trais yn y cartref yn dderbyniol

• Annog adrodd am drais yn y cartref a lleihau’r achosion o ymosod ar rywun dro ar ôl tro.
• Cynyddu hyder y sawl sy’n dioddef a sicrhau eu bod yn gallu dod o hyd i’r gwasanaethau a chymorth sydd ar gael iddynt
• Sicrhau nad yw plant a phobl ifanc yn derbyn trais yn y cartref
• Mesur beth yw gwir gost trais yn y cartref – yn ariannol ac i bobl
• Sicrhau bod troseddwyr yn ysgwyddo’r cyfrifoldeb am eu hymddygiad

Mewn ymateb i Strategaeth Genedlaethol Cymru Gyfan: Mynd i’r Afael â Thrais yn y Cartref, mae Fforwm Trais yn y Cartref Powys wedi llunio amrywiaeth o ddeunyddiau hyrwyddo i godi ymwybyddiaeth am yr help sydd ar gael i’r sawl sy’n dioddef trais yn y cartref. Mae’r rhain yn cynnwys cardiau gwybodaeth, cylch allweddi, nodau llyfr a nodiadau ‘post-it’ gyda manylion  Llinell Gymorth Trais yn y Cartref Cymru a mudiadau sy’n cynnig help a chyngor. Mae gan y Fforwm wefan hefyd sy’n benodol ar gyfer plant a phobl ifanc sef  – ‘Not Your Fault’ ac mae wedi dosbarthu matiau llygoden a bandiau garddwn i ysgolion ym Mhowys. Mae Fforwm Trais yn y Cartref Powys yn ymroddedig o ran herio’r syniad fod trais yn y cartref yn dderbyniol.

Nid oes unrhyw esgus dros ymddwyn yn dreisgar, a dim ond y sawl sy’n gwneud hyn sydd ar fai. Yn ystod mis Tachwedd a Rhagfyr, rhoddodd Fforwm Trais yn y Cartref Powys 15,000 o fatiau cwrw i dafarnau led led Powys. Cafodd hyn ei ariannu trwy Bartneriaeth Diogelwch Cymunedol Powys, i ledaenu’r neges nad yw trais yn y cartref yn ymddygiad derbyniol, os ydych yn feddw neu’n sobr.